不眠王子

City’super 傳統月餅禮盒意外小驚喜

由不眠王子於 2012年09月22日發表人氣：696

電郵給朋友

唔好睇錯標題，係意外小驚喜，唔係少驚喜呀！之前講過啦！今年係王子收到最多月餅嘅一年，收到下星期都仲會有幾盒嚟緊，雖然推咗唔少大品牌嘅月餅試食，但近期都有喺朋友度試過幾款，其中對美記及聖記嘅月餅最為失望，蓮蓉嘅質素一年差過一年，可能成本包括埋星級代言人嘅廣告費吧！

人生苦短，為咗某啲名牌月餅排餐死？上拍賣網買炒貴晒嘅月餅卷？Come on！大家係咪忘記咗食月餅嘅背後意義呀！食件月餅都要咁辛苦，好食到飛起都係假啦！無大賣廣告嘅傳統雙黃白蓮蓉月餅亦有唔少值得推介嘅好貨色，好似 City'super 今年推出嘅傳統月餅禮盒，水準明顯比上年高咗好多。

睇到呢度你可能會話 : 唓~ 你收到公關送嘅月餅梗係讚好啦！嗱！咁你就錯啦！你無睇上一篇 Blog 咩？人哋請但如果唔好食嘅一樣可以照出流克。仲有，王子上年都有收到 City'super 出嘅月餅，但我亦無出到 Blog。

City'super 傳統月餅禮盒 ($328) 雙黃白蓮蓉月餅，跟唔少人氣品牌一樣，都係選用純正湖南頂級蓮子及原隻金黃蛋黃製作而成。

雙黃白蓮蓉月餅一盒 4 個，每個梗係獨立包裝啦！

個個都焗得咁靚，色澤夠晒均勻，皮薄到透咗啲蓮蓉出嚟！

皮薄餡靚，有實物你睇，唔係用品牌提供嘅廣告相架！

白蓮蓉香噴噴，質感軟滑且甜度適中，攞上手亦無乜肥膩感，蛋黃亦夠完整，用刀一切即現形，無得呃嘅！所以我話有意外小驚喜囉！( 我又唔會話係大驚喜咁浮誇嘅！)

除咗雙黃白蓮蓉月餅，佢哋仲推出咗由全人手鮮製嘅特級酥皮月餅禮盒 ($288) ，內有合桃芝麻酥皮月餅 4 個及蛋黃白蓮蓉酥皮月餅 4 個，有興趣不妨買埋佢試吓！