文章
相簿

澳 門 酒 店 ● 食

新葡京酒店 Don Alfonso 1890 米芝蓮星級 南意風情

不眠王子 於 2010年04月19日發表   人氣:785


       公 眾 假 期 後 嘅 星 期 五 過 咗 澳 門 小 休 2 日 ,諗 住 周 圍 行 吓 影 吓 食 吓 減 吓 壓 ,無 奈 天 公 不 造 美 ,天 灰 灰 ,偶 然 仲 落 埋 雨 ,掃 興!因 為 當 晚 喺 新 葡 京 酒 店 過 夜 ,我 對 賭 又 無 興 趣 ,於 是 由 lunch 、dinner 到 第 2 日 嘅 早 、午 、晚 餐 甚 至 下 午 茶 都 喺 新 舊 葡 京 酒 店 2 邊 走 嚟 走 去 搞 掂 晒 ,幫 襯 咗 酒 店 旗 下 嘅 6 間 餐 廳 ,都 可 以 話 係 壯 舉 咯!

  落 船 正 好 午 飯 時 間 ,先 去 Don Alfonso 1890 食 lunch ,睇 資 料 知 道 Don Alfonso 1890 榮 獲 南 意 大 利 米 芝 蓮 星 級 餐 廳 最 高 評 價 ,而 呢 間 Macau 店 喺 新 葡 京 開 咗 只 不 過 3 年 鬆 啲 ,出 發 前 睇 過 某 位 資 深 食 友 去 年 暑 假 嘅 不 快 經 驗 ,個 心 其 實 15 、16 ,但 聽 朋 友 講 上 年 年 底 廚 師 嘅 班 底 換 過 晒 ,總 廚 一 職 現改 由 Vincenzo Castaldo 主 理 ,整 體 質 素 亦 提 昇 咗 ,於 是 抱 住 即 管 試 吓 嘅 心 態 去 食 ,好 彩!全 程 有 88% 係 滿 意 嘅!

  世 上 有 幾 多 100% 完 美 呢?有 88% 滿 意 度 已 經 好 勁。

  輪 service 及 排 場 ,呢 度 絕 對 係 100 分 嘅!我 搵 唔 到 有 乜 嘢 可 以 挑 剔 ,尤 其 是 當 你 喺 香 港 食 開 意 大 利 餐 ,你 就 會 更 感 覺 到 喺 度 所 享 受 到 嗰 份 尊 貴 嘅 禮 遇。 

 

 滿 頭 白 髮 嘅 就 係 Don Alfonso 第 四 代 傳 人 : 星 級 名 廚 Alfonso Laccarino ,而 開 始 烹 調 意 粉 嘅 就 係 現 任 Don Alfonso Macau 嘅 總 廚 Vincenzo Castaldo。

  

   呢 一 張 相 一 定 要 post ,難 得 近 距 離 見 到 據 聞 市 值 接 近 70 萬 蚊 嘅 古 董 咖 啡 壺 . . . 我 估 係 咖 啡 壺 咋!

  

   呢 度 嘅 藏 酒 量 超 過 6000 個 label . . . 係 呀!唔 係 6000 支 ,係 6000 個 牌 子 呀!我 唔 係 酒 友 ,但 相 信 酒 友 一 定 會 嚟! 

  

   名 酒 超 過 6000 隻 咁 多 ,睇 吓 2 本 藏 酒 集 咁 厚 就 得 人 驚

  

   唔 想 逐 頁 揭 咁 辛 苦 ,可 以 睇 電 子 書 慢 慢 揀 靚 酒。 

  

   一 入 門 口 就 見 到 2 個 專 用 作 焗 麵 包 嘅 大 焗 爐。

  

   餐 廳 環 境 當 然 係 富 麗 堂 皇 ,整 個 室 內 設 計 跟 杜 拜 嘅 帆 船 酒 店 及 香 港 嘅 四 季 酒 店 均 出 自 同 一 名 家 嘅 手 筆。

  

   嚟 呢 類 fine dining 嘅 餐 廳 當 然 有 dress code ,唔 好 以 為 身 上 嗰 件 係 猿 人 tee ,踢 對 涼 鞋 就 俾 入 ,加 番 件 外 套 先 啦!

  

   呢 間 係 Don Alfonso 1890 嘅 VIP 房 ,格 局 當 然 更 grand 啦!

  

   牆 上 仲 有 Alfonso 自 家 出 品 嘅 意 大 利 黑 醋 、橄 欖 油 等。點 解 我 影 到 咁 多 相 ,過 咗 lunch time ,無 乜 人 嘛!

  

   一 籃 子 麵 包 有 軟 有 硬 ,最 吸 引 嘅 當 然 係 印 住 代 表 店 名 1890 嘅 麵 包 啦!麵 包 雖 然 唔 係 熱 辣 辣 出 爐 ,但 攞 上 手 依 然 係 暖 烘 烘 嘅!原 味 、蕃 茄 味 都 好 正。

  

   軟 身 麵 包 相 當 鬆 軟 ,輕 輕 力 一 按 ,慢 慢 彈 返 原 位 ,食 得 出 新 鮮 拱 焗。硬 身 包 我 唔 太 食 ,no comment。

     

  食 麵 包 一 向 少 點 牛 油 、黑 醋 、橄 欖 油 ,但 Alfonso 自 家 嘅 陳 年 黑 醋 及 橄 欖 油 亦 好 出 名 ,一 定 要 試 吓!

  店 中 嘅 餐 具 清 一 色 係 Hermes 嘅 出 品 ,感 覺 格 外 高 貴

  

   意 式 甜 椒 脆 粉 卷 釀 銀 雪 魚 慕 絲 及 甜 椒 泡 未 配 水 瓜 柳 汁 ($220) 係 相 當 清 新 健 康 嘅 頭 盆 ,4 款 賣 相 精 緻 嘅 小 物 全 部 係 以 唔 同 嘅 新 鮮 蔬 菜 製 作 而 成 ,佐 以 水 瓜 柳 汁。

  

   銀 雪 魚 慕 絲 味 道 比 較 清 淡 ,蘸 少 少 甘 香 嘅 水 瓜 柳 汁 去 提 味 反 而 有 佳 嘅 效 果。

  

   呢 一 款 我 最 有 印 象 ,望 落 似 粒 海 綿 ,原 來 係 用 黃 椒 整 成 ,入 口 好 香 香 甜 甜 ,但 最 得 意 嘅 係 好 有 泡 沫 感 覺。

   

   脆 粉 卷 釀 銀 雪 魚 慕 絲 製 法 似 意 大 利 肉 卷 ,外 皮 薄 身 鬆 脆 ,裡 面 嘅 銀 雪 魚 慕 絲 入 口 即 溶。下 面 軟 綿 綿 帶 點 微 辣 嘅 其 實 係 紅 椒 嚟!都 幾 有 驚 喜 架!

  

   南 意 大 利 蕃 茄 湯 配 淡 水 小 龍 蝦 及 香 草 ($140) 係 一 道 相 當 令 人 回 味 嘅 菜 式 ,亦 盡 情 展 現 到 何 謂 fine dining。

  

   小 龍 蝦 肉 size 雖 然 細 ,但 肉 質 鮮 味 十 足。

  

   女 侍 應 捧 住 一 壺 熱 氣 騰 騰 嘅 意 大 利 蕃 茄 湯 順 時 針 倒 於 小 龍 蝦 嘅 外 圍 ,濃 濃 嘅 蕃 茄 鮮 香 即 時 四 散。

  

   蕃 茄 係 嚟 自 意 大 利 南 部 盛 產 蕃 茄 嘅 Campania ,Don alfonso 嘅 自 家 菜 園 ,香 草 則 嚟 自 Punta Campanella 指 定 嘅 獨 家 供 應 商 ,盡 見 餐 廳 對 各 種 配 料 嘅 嚴 謹 及 一 絲 不 苟 嘅 態 度。

  蕃 茄 湯 非 常 濃 稠 ,飲 完 咀 唇 仍 帶 住 陣 陣 蕃 茄 鮮 香 ,久 而不 散 ,跟 龍 蝦 肉 一 齊 放 入 口 ,美 味 得 難 以 形 容。

  

   傳 統 螺 絲 粉 伴 地 中 海 蜆 及 黃 瓜 ($150) 超 特 別 ,那 塊 一 大 片 炸 到 脆 卜 卜 嘅 ,原 來 係 黃 瓜 嘅 花 瓣 ,味 道 帶 有 少 少 甘 澀 ,螺 絲 粉 煮 到 啱 啱 好 夠 Al Dente ,柔 韌 有 咬 口 ,但 味 道 就 稍 嫌 鹹 咗 啲 啲!

  

   地 中 海 蜆 肥 嘟 嘟 、夠 飽 滿 ,味 道 鮮 甜 爽 口。

   

   炸 海 鱸 魚 雲 吞 配 醃 檸 檬 皮 及 特 色 香 料 甘 荀 蓉 ($380) 有 一 大 件 意 大 利 雲 吞 於 碟 中 ,外 圍 點 上 甘 荀 蓉。

  

   將 雲 吞 切 開 ,內 裡 嘅 海 鱸 魚 仍 然 係 熱 烘 烘 嘅!魚 肉 鮮 嫩 滑 溜 又 juicy ,唯 一 嘅 遺 憾 係 我 掛 住 食 ,忘 記 影 相 . . . 

  

   雲 吞 皮 炸 到 金 黃 鬆 脆 ,相 當 香 口。

   

   意 式 鹿 兒 島 和 牛 配 香 脆 意 粉 及 三 式 醬 汁 : 青 水 欖 、蕃 茄 及 辣 根 ($690) 係 呢 餐 最 貴 嘅 一 道 菜 ,但 平 時 食 幾 片 優 質 和 牛 都 要 $200 以 上 , 鹿 兒 島 和 牛 已 經 夠 矜 貴 ,仲 要 咁 厚 咁 大 件 ,如 果 好 味 嘅!呢 個 價 都 合 理 嘅!

  

   和 牛 上 面 一 條 條 嘅 其 實 係 炸 得 香 脆 嘅 意 粉 ,炸 意 粉 都 係 第 一 次 食 ,蘸 啲 蕃 茄 汁 食 感 覺 都 幾 得 意。

  

   鹿 兒 島 和 牛 點 咗 5 成 熟 ,似 乎 over 咗 少 少?外 表 而 矣!和 牛 咁 厚 身 ,一 切 開 其 實 係 剛 剛 好 5 成 ,唔 好 問 我 味 道 係 點 ,只 可 以 講 食 完 到 而 家 我 仲 記 得 嗰 份 牛 味 有 幾 濃。

  

   Neapolitan 脆 葉 釀 玉 桂 忌 廉 及 櫻 桃 ($90) 係 Don Alfonso 嘅 招 牌 甜 品 ,豈 能 不 試?Neapolitan 睇 外 表 都 知 道 有 幾 酥 脆 ,數 以 十 層 嘅 酥 皮 層 層 疊 ,咬 落 去 香 脆 鬆 化 到 不 得 了 之 餘 ,仲 滲 出 清 新 嘅 肉 桂 香。

  

   櫻 桃 醬 香 噴 噴 、甜 到 膩 ,配 合 酥 脆 嘅 Neapolitan 更 惹 味

  

   餐 後 點 杯 Cappuccino 中 和 吓!味 道 無 驚 喜 但 水 準 不 俗。

   凍 咖 啡 則 麻 麻 哋!唔 夠 香 濃 ,可 能 加 啲 嘢 會 好 啲 . . .

  

   Petit four 係 咖 啡 伴 侶 ,5 款 小 食 賣 相 一 般 ,但 部 份 味 道 唔 錯 ,用 嚟 送 咖 啡 個 人 推 介 果 撻 及 中 間 嘅 布 朗 尼 蛋 糕。 

  

   咖 啡 飲 到 一 半 ,不 妨 試 試 外 表 最 唔 起 眼 嘅 小 食 ,鬆 軟 嘅 麵 包 外 層 裡 原 來 有 滑 滑 嘅 忌 廉 及 濃 濃 嘅 酒 香 ,配 埋 熱 咖 啡 一 飲 ,個 人 即 時 醒 神 晒。

  呢 餐 埋 單 接 近 $2400 ,喺 譽 滿 全 球 嘅 星 級 餐 廳 嚟 講 我 估 差 唔 多 吧!反 正 嚟 到 ,總 無 理 由 吓 吓 就 住 就 住 食 吧?

  不 過 ,如 果 唔 想 好 似 我 咁 散 點 ,想 經 濟 啲!呢 度 亦 有 幾 款 lunch set ,價 錢 都 係 $300-$400 左 右 ,相 當 抵 食 架!

   

  臨 行 出 門 口 ,不 妨 喺 枱 面 攞 2 粒 用 作 迎 賓 嘅 意 大 利 糖 果 試 試 ,但 小 心 一 食 上 癮 噃!  

  

   仲 有 好 香 嘅 杏 仁 朱 古 力 ,我 食 吓 食 吓 放 咗 5 粒 入 口。

  

   電 話 : (853) 8803 7722   平 均 消 費 : $300 - $900 / 位

  地 址 : 澳 門 葡 京 路 新 葡 京 酒 店 3 樓

 

 


上一篇: 新葡京酒店 Crystal Lounge & Deli 堂食 City Super

下一篇: Sony Ericsson XPERIA X10 Blogger Event


不眠王子

多功能吃喝玩樂寫Blog人累積瀏覽人次突破2000萬


Come On Baby 緊貼我吧







搜尋王子的文章
累計瀏覽次數: 24,689,049
所有文章: 2,060
本日訪客人數: 571
累計訪客人數: 9,546,355